ITEM, For-sa-meikle as the zouth is not onelie seene to preserve the commoun weill, bot alswa of them mon rise sik, as after this mon serve in the Kirk of God, within this Realme, and to the commoun weill of the samin. And because the povertie of many is in sik sort, that they may not hald their Children at letteris, quhairby the maist part of the zouth of this Realme wantis the guiftis and graces of learning, requisite to that charge. For remeid heirof: OUR SOVERAINE LORD, with advise and consent of my Lord Regent, and the three Estaites of this present Parliament, hes statute and ordained, that all Patronis havand Provestries, or Prebendaries of Colleges, Alterages or Chaplaneries, at their giftis and disposition, may in all times cumming, at their pleasure present the samin to Bursaris, quhom they pleise to name, to studie vertew and letteris, within ane College of ony of the Universities of this Realme, there to remaine for sik space, as the Patron foirsaid pleasis to hald him at vertew and learning, within the foirsaid College, and as sall be aggried upon be the Patronis of the saidis Provestries, or Prebendaries, with the Principal and Maisters of the College of the Universities. And after the Patron removeth that Bursar furth of the said College, to present ane uther. And swa furth fra ane to ane uther, to the effect foirsaid, at the Patronis pleasure: notwithstanding ony fundatioun, or confirmatioun past, be quhatsumever authoritie in ony times bygaine. Anent the quhilk our Soveraine Lord, my Lord {364} Regent, and the three Estaites of this present Parliament, dispensis: Swa that the saidis Patronis may dispone their Provestries, and Prebendaries, to sik Bursaris, as they sall think expedient, als oft as neid beis. Quhilk sall be na hurt, nor prejudice to their Patronage, notwithstanding their fundationes, and Confirmationes quhat-sumever, or ony provision conteined thereintil. And therefore our SOVERAINE LORD, my Lord Regent, and the three Estaites foresaides, heartelie requests all Patrones of Colleges, Prebendaries, and Provestries, to graunt and dispone their Provestries and Prebendaries to the Bursaris foresaidis, in maner above specified. Swa that lerters may be authorized, and the zouth sufficientlie brought up in vertew and learning, to the glory of God, and comfort of the common weill of this Realme.