ITEM, It is statute, and ordained be our Soveraine Lord, with advise and consent of his dearest Regent, & three Estaites of this present Parliament, that gif ony person or personis within this Realme, to Burgh or to land, sall commit the filthie vice of Fornication and beis convict thereof, that the committeris thereof, sall be punished in maner following. That is to say, for the first fault, alsweil the man, as the woman, sall pay the summe of fourtie pundis: Or then baith he, and she, sall be imprisoned for the space of aucht dayes, their fude to be breade and small drinke. And thereafter presented to the mercat place of the Towne or Parochin bair-headed, & there stand fastened, that they may not remoove, for the space of twa houres: as fra ten houres to twelve houres at noone. For the second fault being convict, they sall pay the summe of ane hundreth markes, or then the foirnamed dayis of their imprisonement sall be doubled, their fude to be bread and water allanerlie. And in the end, to be presented to the said mercat place, and baith the headis of the man & the woman to be schaven. And for the thrid fault, being convict thereof, sall pay ane hundreth pundis, Or else their above imprisonment to be tripled, their fude to be breade and water allanerlie. And in the end, to be tane to the deipest and foullest pule, or water of the Towne, or Parochin, there to be thrise dowked, and theirafter banished the said Towne, or Parochin for ever. And fra thine furth, how oft that ever they be convict, of the foresaide vice of Fornication, that sa oft the said thrid penaltie be execute upon them. And that the Provest and Baillies of ilk Burgh, the Justice general, and his deputes, or sik {365} uthers persones, as sall please our said Soveraine Lord to give commission unto, be Judges to the persones suspect, & delated of Fornication: and being convict, they sall lift and uptake the above written pecunial paines, of the persones responsal, & rather willing to pay the samin, nor to be demained in their persones. And that the saidis corporal paines of imprisonment, banishing, and uthers above specified, be execute upon all sik persones, as outher refusis to pay the pecunial paines, or that ar not responsal to pay the samin. And that the samin pecunial paines, quhilkis sall happen to be received, be surelie keiped in ane close box, and be converted ad pios usus, in they partis, quhair the cryme is committed, as it sall please our said Soveraine Lord, and his dearest Regent to commande. And the receivers of the said paynes, to be ready to give accompt thereof, quhen ever they sall be requyred thereunto.