ITEM, Forsameikle for the abolishing of great quantitie of false cunzie, quhairwith the common weill of this Realme is greatlie troubled, to the heavie damnage, and skaith of the haill lieges thereof: THEREFOIRE, It is devised, statute, and ordained, be our Soveraigne Lorde, with advise of his Regent, and the three Estaites of this present Parliament, that certaine men of Judgement, having understanding of cunzie, be chosen and elected, within everie Burgh of this Realme. Quha being sworne thereto, all summes of money sall bee delivered in their presence, & quhair ever they apprehend, or finde any false money, to clip the samin. And the deliverer to tyne the said false money, and the clipper to have ane penny of ilk pound, for his labouris of the receiver of the money, quhilk sall be received. And to that effect, ordaines the Provest and Baillies, & all uthers officiaris of Burrowes, to make sufficient clipping houses, in sik places of their Burgh, as sall be sufficient for the premisses. And the personis, quhom to they commit that charge, that they be abil to answer for their office in that behalfe.